Dekabrın 5-də BMT-nin Əhali Fondunun dəstəyi ilə həyata keçirilən “Azərbaycanın cənub bölgəsində təhlükəsiz analıq” pilot layihəsinin icrası çərçivəsində Lənkəran Tibb Kollecində tibb bacısı/qardaşı istiqaməti üzrə təhsil alan tələbələr üçün təlim sessiyası keçirilib.
Sessiya zamanı iştirakçılara pilot layihə haqqında məlumat verilib, ana ölümlərinin azaldılması istiqamətində tətbiq olunan qabaqcıl strategiyalardan bəhs edilib. 
Tədbir İnsanın İmmunçatışmazlığı Virusu (İİV) ilə yoluxmanın erkən diaqnostikasının ana ölümlərinin qarşısının alınmasındakı rolu və profilaktika tədbirləri, eləcə də İİV/QİÇS xəstəliyinin yaratdığı stiqma və ayrıseçkilik və onunla mübarizə mövzularında Respublika QİÇS-lə Mübarizə Mərkəzinin əməkdaşlarının təqdimatları ilə davam etdirilib.
Qeyd edək ki, “Azərbaycanın cənub bölgəsində təhlükəsiz analıq” layihəsinin tərəfdaşları qismində BMT-nin Əhali Fondu, İcbari Tibbi Sığorta üzrə Dövlət Agentliyi, TƏBİB, Elmi-Tədqiqat Mamalıq və Ginekologiya İnstitutu, Səhiyyə Nazirliyinin Respublika QİÇS-lə Mübarizə Mərkəzi və İctimai Səhiyyə və İslahatlar Mərkəzi çıxış edirlər.
