Səhiyyə Nazirliyi Respublika QİÇS-lə Mübarizə Mərkəzinin (RQMM) təşəbbüsü, Təhsil Nazirliyinin Mərkəzi Aran Regional Təhsil İdarəsinin dəstəyi ilə Ağdaş rayonundakı 1, 2, 3, 7, 8 nömrəli tam orta məktəblərin və İnternat tipli THT fənləri təmayüllü Gimnaziyanın şagird və müəllim heyəti üçün “Sağlam gənclik – sağlam gələcək” adlı maarifləndirici aksiyalar təşkil edilib. “Azərbaycanda Avropa İİV-ə Testləşmə həftəsi” ərəfəsində keçirilən tədbirlərdə məktəblərin X-XI sinif şagirdləri və müəllimləri iştirak ediblər.
Tədbirlərdə çıxış edən RQMM-in epidemioloqu Dilşad Mahmudova öncə İnsanın İmmunçatışmazlığı Virusu (İİV) və Qazanılmış İmmun Çatışmazlığı Sindromu (QİÇS) ilə bağlı ümumi məlumat verib. Həkim gənclər arasında xəstəliyin yayılma təhlükəsini, virusdan qorunmağın yollarını xatırladıb, bu virusa yoluxmuş insanların immunitetinin kəskin zəifləməsi nəticəsində bir çox xəstəliklərə asanlıqla tutulduğunu diqqətə çatdırıb.
Mütəxəssis iştirakçılara ölkəmizdə sağlam həyat tərzinin geniş təbliği, narkomaniyanın, fəsadlarından geniş məlumat verib.
Şagirdlərə, həmçinin İİV infeksiyasının diaqnostikası, müalicəsi və profilaktikası haqqında ətraflı məlumat verilib, onları maraqlandıran suallar cavablandırılıb.
