Səhiyyə Nazirliyi Respublika QİÇS-lə Mübarizə Mərkəzi Bakıdakı 45, 82, 193 nömrəli tam orta məktəblərin şagird və müəllim heyəti üçün “Sağlam gənclik – sağlam gələcək” adlı maarifləndirici tədbirlər keçirib. Tədbirlərdə məktəblərin yuxarı sinif şagirdləri və müəllimləri iştirak ediblər. Məktəblilər İnsanın İmmunşatışmazlığı Virusu (İİV), Qazanılmış İmmun Çatışmazlığı Sindromu (QİÇS) ilə bağlı məlumatlandırıb.
Respublika QİÇS-lə Mübarizə Mərkəzinin mütəxəssisi Emilya Şahbazova çıxışında şagirdlərə sağlam həyat tərzini aşılayan tövsiyələr verib, bəşəriyyətin ən böyük bəlalarından olan narkomaniyanın cəmiyyətin mənəvi dəyərlərinə, insanların həyatına, sağlamlığına ciddi maneə olduğunu vurğulayıb.Virusa yoluxma yolları, qorunma və müalicə üsullarından danışan həkim şagirdləri zərərli vərdişlərdən uzaq olmağa, ən əsası isə bu sahədə mövcud bilgiləri mənimsəməyə çağırıb.
Sonda şagirdlərə İİV/QİÇS-ə aid broşurlar, bukletlər paylanıb, xəbərdaredici məlumatlar verilib, onları maraqlandıran suallara aydınlıq gətirilib.
