Noyabrın 11-də Səhiyyə Nazirliyi Respublika QİÇS-lə Mübarizə Mərkəzi Bakıdakı 45 nömrəli tam orta məktəbdə “QİCS-ə qarşı mübarizə” adlı maarifləndirici tədbir keçirib. Məktəbin yuxarı sinif şagirdləri və müəllimlərinin iştirak etdiyi tədbirdə məqsəd onları QİÇS, eləcə də narkomaniya və digər zərərli vərdişlərin fəsadları barədə məlumatlandırmaq, məktəblilərin təhsilə, elmə, idmana olan marağını artırmaq idi.
Məktəbin həkimi Samirə Bağırova çıxışında bəşəriyyətin ən böyük bəlalarından olan narkomaniyanın cəmiyyətin mənəvi dəyərlərinə, insanların həyatına, sağlamlığına ciddi maneə olduğunu bildirib. 
Respublika QİÇS-lə Mübarizə Mərkəzinin infeksionist həkimi Emilya Şahbazova isə çıxışında şagirdlərə sağlam həyat tərzi nədir və sağlam olmaq üçün nələrə əməl edilməsi haqqında tövsiyələr verib. Həkim şagirdləri narkotika istifadəçiləri arasında geniş yayılan İnsanın İmmunşatışmazlığı Virusu (İİV), Qazanılmış İmmun Çatışmazlığı Sindromu (QİÇS) ilə bağlı məlumatlandırıb. Virusa yoluxma yolları, qorunma və müalicə üsullarından danışan həkim çagirdləri zərərli vərdişlərdən uzaq olmağa, ən əsası isə bu sahədə mövcud bilgiləri mənimsəməyə çağırıb.
Sonda şagirdləri maraqlandıran suallara aydınlıq gətirilib.
