Dayanıqlı İnkişaf Məqsədlərinin maarifləndirilməsi istiqamətində nəzərdə tutulmuş tədbirlər çərçivəsində Səhiyyə Nazirliyi Respublika QİÇS-lə Mübarizə Mərkəzi (RQMM) may-iyun aylarında müayinə və maarifləndirmə aksiyaları keçirib. Aksiyalar Mərkəzin regional laboratoriyasının dəstəyi ilə bütün ölkə ərazisini əhatə edib.
Tədbirlərdə irqindən, milliyyətindən, dinindən, sosial vəziyyətindən asılı olmayaraq heç kimin Qazanılmış İmmun Çatışmazlığı Sindromundan (QİÇS) sığortalanmadığı vurğulanıb. Hər il may ayının III həftəsi QİÇS-dən vəfat edənlərin xatirəsinin Anım günü kimi ölkəmizdə də qeyd olunub. Cəmiyyətin diqqətini bu problemə cəlb etmək, virusla yaşayan insanlara qarşı diskriminasiyanı aradan qaldırmaq, onların ailə üzvlərinə, yaxınlarına dəstək olmaq üçün ictimaiyyətə bu haqda geniş informasiya çatdırılıb. Eyni zamanda, tədbirlər çərçivəsində müayinələr götürülüb, virus və xəstəliyə aid məlumatları özündə əks etdirən çap materialları (vərəqlər, broşurlar, bukletlər, kitabçalar) hazırlanaraq paylanıb, ölkəmizdəki mövcud reklam vasitələrində video-çarxlar, xəbərdarlıqlar, çağırışlar, anonslar yerləşdirilib. 
Aksiyalar şagird, tələbə, müəllim heyətinin məlumatlılıq səviyyəsinin artırılması üçün orta və texniki peşə məktəblərində, kolleclərdə, ali təhsil ocaqlarında, xəstəxanalarda, sağlamlıq mərkəzlərində, ticarət obyektlərində, istehsal müəssisələrində, insanların daha çox cəmləşdiyi digər yerlərdə təşkil olunub. Tədbirlərin iştirakçılarına İİV/QİÇS-in yoluxma yolları, profilaktikası, müayinəsi, müalicəsi barədə ətraflı məlumat verilib. Vətəndaşlara anonim və ödənişsiz şəkildə ekspres-testdən keçmək imkanı yaradılıb. Ümumilikdə 30 minədək insan bu xidmətdən yararlanıb.
Dövlət və özəl tibb müəssisələrində, güc strukturlarında, hüquq-mühafizə orqanlarında çalışan tibbi heyət, İİV-ə yoluxmağa həssas əhali qrup nümayəndələri arasında iş aparan autriçlər üçün təlimlər təşkil olunub.
Respublika QİÇS-lə Mübarizə Mərkəzi ən əlverişli və hər kəs üçün əlçatan olan maarifləndirmə variantına xüsusi önəm verərək İİV-in müayinəsi, müalicəsi ilə bağlı icra etdiyimiz işləri ölkəmizdə fəaliyyət göstərən telekanallarda, elektron KİV-lərdə yayımlanmasını həyata keçirib.
Gündəlik 700 min sərnişinin istifadə etdiyi Bakı Metropoliteninin 18 stansiyasında xüsusi hazırlanmış videoçarxlarımız fasiləsiz yayımlanıb. Azərbaycan Dövlət Reklam Agentliyi paytaxtın mərkəzi küçə və prospetlərində videoçarx və anonslarımızı yerləşdirib. Bakı Nəqliyyat Agentliyi gün ərzində 180-200 min sərnişinin istifadə etdiyi Nəqliyyatın İntellektual İdarəetmə Mərkəzində videoçarxlarımızı yayımlamaqdadır. Eyni zamanda, sərnişinlərin daha çox istifadə etdiyi Agentliyə məxsus dayanacaqlarda sosial reklamlarımız nümayiş etdirilir.
Yaşından asılı olmayaraq hər kəsin sağlam yaşamasını təmin etmək əsas hədəflərimizdəndir.
