Səhiyyə Nazirliyi Respublika QİÇS-lə Mübarizə Mərkəzinin (RQMM) təşəbbüsü ilə Elmi-Tədqiqat Pediatriya İnstitutunda tibb işçiləri üçün təlim keçirilib.
Məqsəd dünyada və Azərbaycanda mövcud epidemioloji vəziyyət barədə məlumat vermək, xəstəxanalar arasında informasiya mübadiləsi aparmaq, insanın immunçatışmazlığı virusu (İİV) indikatorları sayılan xəstəliklər və onların əlamətlərinə dair müzakirələr təşkil etmək, tibb müəssisələrində İİV infeksiyasının profilaktikasına aid universal təhlükəsizlik qaydalarını aşılamaq idi.
Tədbiri giriş sözü ilə institutun direktoru, tibb üzrə fəlsəfə doktoru Allahverdi Musayev açaraq müzakirəyə çıxarılan məsələlərin aktuallığını vurğulayıb, iştirakçıları aktivliyə dəvət edib.
RQMM-in direktor müavini Səbinə Babazadə isə Mərkəzin hazırda icra etdiyi işlər, üzərinə düşən vəzifələr haqqında ətraflı məlumat verib, İİV-ə nəzarətin qanunvericiliyin tələblərinə uyğun tənzimlənməsi ilə bağlı fikirlərini bölüşüb.
Müzakirə zamanı İİV-in ölkəmizdə yayılmasının qarşısının alınmasının, hər bir tibb işçisinin sağlam və təhlükəsiz həyat tərzi barədə biliklərinin artırılmasının vacibliyinə diqqət çəkilib.
Tədbirdə, həmçinin RQMM-in Epidemioloji nəzarət və profilaktika şöbəsinin müdiri Səbuhi Əliyev “Azərbaycanda İİV infeksiyası/QİÇS-lə bağlı epidemiolojı vəziyyət və mübarizə tədbirləri”, Qəbul şöbəsinin müdiri Ədilə Rzayeva “Respublika QİÇS-lə Mübarizə Mərkəzində İİV-ə görə aparılan müayinələr və mövcud çətinliklər”, Mərkəzin müalicə işləri üzrə mütəxəssisi Samirə Vəliyeva “Kontaktdan sonra profilaktika” və “Uşaqlar arasında İİV-ə müayinənin aparılması, İİV/QİÇS-in təsdiqlənməsi meyarları. Xəstəliyin kliniki gedişatı. ART haqqında ümumi məlumat” dair təqdimatları dinlənilib.
Çıxış edənlər İİV qrupu xəstəliklərinin diaqnostikası, müalicəsi və təmasdan sonrakı profilaktika ilə bağlı müfəssəl məlumat verib, tibb müəssisələri arasında əməkdaşlığın yaradılması, müayinələrin götürülməsi, nəqli, göndərilməsi kimi məsələlərə xüsusu maraq göstəriblər.
