Səhiyyə Nazirliyi Respublika QİÇS-lə Mübarizə Mərkəzində Ümumdünya Mülki Müdafiə Günü ilə bağlı tədbir keçirilib.
Həkim heyəti və texniki işçilərin iştirak etdiyi tədbirdə Mərkəzin təşkilati-metodiki işlər şöbəsinin müdiri Eldəniz Muradov mülki müdafiənin əhəmiyyəti, vəzifələri, fövqəladə hallara qarşı necə hazırlıqlı olmağın yolları haqqında ümumi məlumat verib. Bildirib ki, Beynəlxalq Mülki Müdafiə Təşkilatının Baş məclisinin qərarı ilə 1972-ci ildən etibarən hər il bu təşkilata üzv ölkələrdə Ümumdünya Mülki Müdafiə Günü kütləvi humanitar tədbir kimi qeyd olunur. Bu gün münasibətilə mülki maarifləndirici tədbirlər keçirilir. Hazırda təşkilata dünyanın 50-dən çox ölkəsi daxildir. 1993-cü ildən nüfuzlu beynəlxalq təşkilata üzv seçilən Azərbaycan Respublikası bu mötəbər qurumla sıx əməkdaşlıq edir.
Tədbirdə fövqəladə hallar zamanı insanlara ilk yardım kimi süni tənəffüsün verilməsi, ürəyin qapalı masajının qaydaları, qanaxma zamanı ilk yardımın edilməsi, zədələnmə və zəhərlənmələr zamanı ilk yardım göstərilməsı və digər hallar geniş izah olunub.
Mərkəzin əməyin mühafizəsi üzrə mühəndisi Xəqani Hacıyev isə istehsalatda və məişətdə təhlükəsizlik qaydalarına ciddi riayət edilməsinə diqqət çəkib, hər kəsin fövqəladə hallara qarşı hazırlıqlı olmasının vacibliyini vurğulayıb.
Sonda tədbir iştirakçılarının təhlükəsizlik texnikası qaydaları ilə bağlı maraqlandıqları suallara ətraflı cavab verilib.
