Səhiyyə Nazirliyinin Respublika QİÇS-lə Mübarizə Mərkəzi “Azərbaycanda Avropa İİV-ə Testləşmə həftəsi” çərçivəsində bölgələrdə də İnsanın İmmunçatışmazlığı Virusunun (İİV) yayılmasının qarşısını almaq üçün maarifləndirmə işlərini uğurla davam etdirir.
Gəncə Regional Laboratoriyasının əməkdaşları Abbas Səhhət adına 1 nömrəli Klinik Xəstəxanada, Azərbaycan Texnologiya Universitetində, Gəncə Tibb Kollecində, Göygöl, Samux, Qazax, Goranboy, Şəmkir rayon mərkəzi xəstəxanalarında, digər səhiyyə və sağlamlıq mərkəzlərində müayinə və maarifləndirmə tədbirləri keçiriblər.
Təhsil ocaqlarında, səhiyyə müəssisələrində işçi və tələbələrə təcrübəli həkimlər tərəfindən İİV/QİÇS-lə bağlı mühazirələr oxunub, xəstəliyin tarixi, yoluxma yolları, profilaktikası, müayinəsi və müalicəsi barədə ətraflı məlumat verilib. Tələbələri maraqlandıran suallar cavablandırılıb, vətəndaşlara ödənişsiz və anonim qaydada İİV-ə ekspres-testdən keçmək imkanı yaradılıb.
Eyni zamanda, tədbir təşkil olunan müəssisələrdə quraşdırılan informasiya guşəsində yüzlərlə vətəndaş həkimlərin təcrübəsindən yararlanıb. Onlara İİV/QİÇS-ə aid broşurlar, bukletlər paylanıb, xəbərdaredici məlumatlar verilib.
