İnsanın İmmunçatışmazlığı Virusu (İİV) ilə mübarizədə həkimlərin arsenalına yeni müasir və təsirli üsul əlavə olunmaqdadır. Hazırda uğurla aparılan tədqiqatların yaxın gələcəkdə bu infeksiyanı tam cilovlamağa imkan verəcəyinə ümid edilir.
Sentyabrın 8-də Respublika QİÇS-lə Mübarizə Mərkəzində Azərbaycan Respublikası Səhiyyə Nazirliyinin Tibbi Profilaktika Elmi-Tədqiqat İnstitutunun kök hüceyrələrinin müxtəlif patologiyalarda istifadəsi üzrə tədqiqat laboratoriyasının qrup rəhbəri, tibb elmləri üzrə fəlsəfə doktoru Rəşad Rəsulovun İİV infeksiyasına yoluxmuş şəxslərin müalicəsində kök hüceyrələrinin tətbiqi ilə bağlı təqdimatı dinlənilib.
Yığıncaqda Dr R.Rəsulov yaxın keçmişdə COVID-19 virusuna yoluxanların qeyd edilən metodika ilə müalicəsində yüksək nəticələr barədə məlumat verib və analoji olaraq, bu üsulun İİV-lə mübarizədə təkmilləşdirilməsi üzərində bir çox ölkələrin işlədiyi diqqətə şatdırıb.
Təqdimat mərasimində İİV infeksiyasına yoluxmuş şəxslərin müalicəsində kök hüceyrələrinin tətbiqi ilə bağlı geniş müzakirələr aparılıb, Respublika QİÇS-lə Mübarizə Mərkəzi ilə birlikdə elmi-tədqiqat işlərinin həyata keçirilməsi qeyd edilib.