Səhiyyə Nazirliyi Respublika QİÇS-lə Mübarizə Mərkəzi (RQMM) tərəfindən Ümumdünya Səhiyyə Təşkilatının (ÜST) və BMT-nin Əhali Fondunun dəstəyi ilə keçirilən təlim öz işini davam etdirir. “İİV/QİÇS-in diaqnostikası, müalicəsi və profilaktikasında müasir yanaşmalar” adlı növbəti təlimə ilkin səhiyyə xidməti mütəxəssisləri cəlb olunublar.
Tədbirdə ÜST-nin Avropa Regional ofisinin İİV Proqramları üzrə koordinatoru Vyaçeslav Grankovun, Səhiyyə Nazirliyi Respublika QİÇS-lə Mübarizə Mərkəzinin direktor müavinləri Səbinə Babazadə və Günəş Cəfərovanın, Mərkəzin psixoloqu Günel Bəbirovanın təqdimatları dinlənilib. İştirakçılara Azərbaycanda İİV/QİÇS-lə bağlı epidemioloji vəziyyət, epidemiyanın müasir aspektləri, İİV-in qarşısının alınmasında ÜST-nin tövsiyələri, stiqma və diskriminasiyaya qarşı mübarizəyə aid məlumatlar verilib.
