Səhiyyə Nazirliyinin Respublika QİÇS-lə Mübarizə Mərkəzi “Azərbaycanda Avropa İİV-ə Testləşmə həftəsi” çərçivəsində bölgələrdə də İnsanın İmmunçatışmazlığı Virusunun (İİV) yayılmasının qarşısını almaq üçün maarifləndirmə işlərini davam etdirir.
Mingəçevir Regional Laboratoriyasının əməkdaşları Mingəçevir Dövlət Universitetində, Mingəçevir Tibb Kollecində, Mingəçevir Turizm Kollecində, eləcə də Mingəçevir, Ağdaş, Göyçay, Ucar, Zərdab rayonlarındakı mərkəzi xəstəxanalarda, ümumtəhsil məktəblərində və əhalinin daha çox sıx olduğu digər yerlərdə müayinə və maarifləndirmə tədbirləri keçiriblər.
Təhsil ocaqlarında, səhiyyə müəssisələrində tələbə və işçilərə təcrübəli həkimlər İİV/QİÇS-lə bağlı mühazirələr oxuyub, xəstəliyin tarixi, yoluxma yolları, profilaktika, müayinə və müalicəsi barədə ətraflı məlumat veriblər. Tələbələr maraqlandıqları suallara cavab alıb, arzu etdikləri halda İİV testindən keçiblər.
Təhsil ocaqlarında quraşdırılan informasiya guşəsində də hər bir insan həkimlərin təcrübəsindən yararlanıb. Onlara İİV/QİÇS-ə aid broşurlar, bukletlər paylanıb, xəbərdaredici məlumatlar verilib.
