Səhiyyə Nazirliyi Respublika QİÇS-lə Mübarizə Mərkəzinin təşəbbüsü ilə Xəzər rayon Şüvəlan qəsəbəsindəki 237 nömrəli tam orta məktəbdə “Özünü QİÇS-dən qoru” adlı maarifləndirmə tədbiri keçirilib. Tədbirdə məktəbin yuxarı sinif şagirdləri və müəllimləri iştirak ediblər.
İştirakçılara İnsanın İmmunçatışmazlığı Virusunun (İİV) törətdiyi fəsadlar, Azərbaycanda bu virusa yoluxma səviyyəsi, Qazanılmış İmmun Çatışmazlığı Sindromundan (QİÇS) qorunmaq yolları barədə geniş məlumat verilib.
Mərkəzin mütəxəssisi Samirə Vəliyeva gənclər arasında xəstəliyin yayılma təhlükəsini, virusdan qorunmağın yollarını xatırladıb, bu virusa yoluxmuş insanların immunitetinin kəskin zəifləməsi nəticəsində bir çox xəstəliklərə asanlıqla tutulduğunu diqqətə çatdırıb.
Tədbirdə çıxış edən məktəbin direktoru Zümrüd Abbasova isə çagirdləri zərərli vərdişlərdən uzaq olmağa, ən əsası isə bu sahədə mövcud bilgiləri mənimsəməyə çağırıb.
Sonda şagirdləri maraqlandıran suallara aydınlıq gətirilib, onlara virus və xəstəliklə bağlı maarifləndirici bukletlər paylanıb.
