Səhiyyə Nazirliyi Respublika QİÇS-lə Mübarizə Mərkəzinin (RQMM) Həmkarlar İttifaqı Komitəsinin (HİK) hesabat-seçki konfransı keçirilib.
Əvvəlcə torpaqlarımızın ərazi bütövlüyü uğrunda canlarından keçən şəhidlərimizin xatirəsi bir dəqiqəlik sükutla yad olunub.
İştirakçıları salamlayan RQMM-in direktoru Famil Məmmədov konfransın işinə uğurlar arzulayıb. Bildirilib ki, HİK Mərkəzin sosial həyatı ilə yanaşı, digər işlərində də əhəmiyyətli rol oynayır.
Daha sonra sədr Ədilə Rzayeva HİK-in fəaliyyəti haqqında hesabat verib. HİK-in təftiş komissiyasının hesabatı dinlənildikdən sonra yeni tərkibin seçilməsi məsələsinə baxılıb. Açıq səsvermə formatında keçirilən seçkidə HİK-in yeni tərkibi seçilib.
Gündəliyə uyğun olaraq HİK-in yeni sədrinin seçilməsi ilə bağlı konfrans iştirakçılarının təklifləri dinlənilib. Təkliflərə əsasən, HİK-in hazırkı sədri, RQMM-in Qəbul şöbəsinin müdiri Ə.Rzayevanın yenidən sədr seçilməsi ilə bağlı namizədliyi irəli sürülüb. Təklif konfransın sədri tərəfindən səsə qoyulub və iştirakçıların yekdil rəyi ilə Ədilə Rzayeva növbəti müddətdə RQMM HİK-in sədri seçilib. Eyni zamanda, Ədilə Rzayeva Səhiyyə İşçiləri Həmkarlar İttifaqı Respublika Komitəsinin IV Qurultayına nümayəndə seçilib. Konfransda RQMM HİK-in təftiş komissiyasının yeni tərkibi də təsdiq edilib.
Sonda Səhiyyə İşçiləri Həmkarlar İttifaqı Respublika Komitəsinin sədr müavinləri Cavid Məmmədov, Qönçə Abdullayeva və RQMM-in direktoru Famil Məmmədov çıxış edərək yeni seçilən heyətə öz tövsiyələrini veriblər.
