İyunun 2-də Bakıdakı 45 nömrəli tam orta məktəbdə ”QİÇS əsrin bəlasıdır” adlı maarifləndirici tədbir keçirilib. Tədbirdə məktəbin 10-11-ci sinif şagirdləri, müəllimləri iştirak ediblər. Məqsəd şagirdləri QİÇS, eləcə də narkomaniya və digər zərərli vərdişlərin fəsadları barədə məlumatlandırmaq idi.
Məktəbin həkimi Samirə Bağırova çıxışında bəşəriyyətin ən böyük bəlalarından olan narkomaniyanın cəmiyyətin mənəvi və əxlaqi dəyərlərinə, eyni zamanda insanların həyatına, sağlamlığına ciddi təhlükə yaratdığını vurğulayıb.
Respublika QİÇS-lə Mübarizə Mərkəzinin infeksionist həkimi Emilya Şahbazova isə narkotika istifadəçiləri arasında geniş yayılan İnsanın İmmun Çatışmazlığı Virusu (İİV) infeksiyası, Qazanılmış İmmun Çatışmazlığı Sindromu (QİÇS) haqqında geniş məlumat verib. Virusa yoluxma yolları, qorunma və müalicə üsullarından danışan həkim çagirdləri zərərli vərdişlərdən uzaq olmağa, ən əsası isə bu sahədə mövcud bilgiləri mənimsəməyə çağırıb.
Sonda şagirdlərin maraqlandıran suallara aydınlıq gətirilib.
