Səhiyyə Nazirliyi Respublika QİÇS-lə Mübarizə Mərkəzinin (RQMM) təşəbbüsü, Quba-Xaçmaz Regional Təhsil İdarəsinin dəstəyi ilə Xaçmaz rayonundakı orta məktəblərdə “Sağlam gənclik – sağlam gələcək” adlı maarifləndirici tədbirlər keçirilib.
Ümumilikdə 9 orta məktəbin yuxarı sinif şagirdlərinin və müəllimlərinin iştirak etdiyi aksiyalarda məqsəd sağlam həyat tərzini təbliğ etmək, məktəbliləri QİÇS, eləcə digər zərərli vərdişlərin fəsadları barədə məlumatlandırmaq, onların təhsilə, elmə, idmana olan marağını artırmaqdan ibarət idi.
Tədbirlərdə çıxış edən RQMM-in mütəxəssisləri İnsanın İmmunçatışmazlığı Virusu (İİV) və Qazanılmış İmmun Çatışmazlığı Sindromuna (QİÇS) aydınlıq gətiriblər. Onlar xüsusi təqdimatlarında gənclər arasında xəstəliyin yayılma təhlükəsini, virusdan qorunmağın yollarını slaydlarla nümayiş etdirib, bu virusun daşıyıcısı olan insanların immunitetinin kəskin zəifləməsi nəticəsində bir çox xəstəliklərə asanlıqla tutulduğunu diqqətə çatdırıblar.
Sonda şagirdlərin mövzu ilə əlaqəli suallarına cavab verilib, onlara virus və xəstəliklə bağlı maarifləndirici bukletlər paylanıb.
