Azərbaycan Respublikası Səhiyyə Nazirliyi ilə Qaçqınların və Məcburi Köçkünlərin İşləri üzrə Dövlət Komitəsi arasında bağlanmış Memorandum əsasında ölkəmizin müxtəlif yerlərində məskunlaşmış keçmiş məcburi köçkünlər arasında infeksiyaların aşkarlanması üçün müayinələr aparılır. Növbəti belə aksiya Layihə Əlaqələndirmə Bürosu, Respublika QİÇS-lə Mübarizə Mərkəzi və Elmi-Tədqiqat Ağciyər Xəstəlikləri İnstitutunun birgə təşkilatçılığı ilə Mingəçevir və Bərdədə keçmiş məcburi köçkün qəsəbələrində həyata keçirilib. Aksiya zamanı İİV, vərəm, hepatit B, C, sifilis infeksiyalarının erkən aşkarlanması üçün ödənişsiz müayinələr götürülüb.
Aksiya vətəndaşların sağlamlıq vəziyyətinin müəyyən edilməsi və qiymətləndirilməsi, xəstəliklərin səbəblərinin aradan qaldırılması və profilaktik tədbirlərin görülməsi məqsədi ilə təşkil edilib. Qəsəbələrin yüzlərlə sakini müayinə olunub, onlara qeyd edilən infeksiyalarla bağlı məlumatlandırıcı broşurlar, bukletlər verilib.
