BMT-nin Uşaq Hüquqları Haqqında Konvensiyasının qəbul edilməsinin ildönümü ərəfəsində keçirilən “Uşaq Hüquqları Aylığı” çərçivəsində, Respublika QİÇS-lə Mübarizə Mərkəzinin təşəbbüsü ilə 39 nömrəli tam orta məktəbdə “Özünü QİÇS-dən qoru” adlı maarifləndirici tədbir təşkil olunub. Tədbirdə məktəbin yuxarı sinif şagirdləri və müəllimləri iştirak ediblər.
Respublika QİÇS-lə Mübarizə Mərkəzinin mütəxəssisi Emilya Şahbazova məktəblilər üçün hazırlanmış xüsusi təqdimatla çıxış edərək İnsanın İmmunçatışmazlığı Virusu (İİV) və Qazanılmış İmmunçatışmazlığı Sindromu (QİÇS) haqqında ətraflı məlumat verib. O, virusun yoluxma yolları, qorunma və müalicə üsulları barədə danışıb, şagirdləri zərərli vərdişlərdən uzaq olmağa və bu mövzuda düzgün bilikləri vaxtında mənimsəməyə çağırıb.
Tədbirin sonunda şagirdlərin sualları cavablandırılıb, onlara İİV/QİÇS mövzusunda maarifləndirici broşürlər və bukletlər paylanıb, xəbərdaredici məlumatlar təqdim olunub.
